संकष्टी चतुर्थीच्या निमित्ताने रांजणगाव श्री महागणपती मंदिरात भाविकांची अलोट गर्दी
रांजणगाव (प्रतिनिधी -शंकर तिडके):
संकष्टी चतुर्थीच्या पावन दिवशी रांजणगाव येथील प्रसिद्ध आणि ऐतिहासिक श्री महागणपती मंदिरात भाविकांची मोठ्या प्रमाणावर गर्दी उसळली. पहाटेपासूनच गणेशभक्तांनी दर्शनासाठी रांगा लावल्या होत्या. मंदिर परिसर गणपती बाप्पा मोरया! च्या जयघोषांनी दुमदुमून गेला होता.
या दिवशी मंदिरात अभिषेक, सामूहिक अथर्वशीर्ष पठण, महापूजा, भजन यांचे आयोजन करण्यात आले होते. भाविकांसाठी प्रसाद वितरणाची विशेष व्यवस्था करण्यात आली होती. धार्मिक वातावरणात भक्तांनी श्रद्धेने सहभाग घेतला.
भाविकांच्या सुरक्षिततेसाठी आणि गर्दीच्या नियंत्रणासाठी पोलिस यंत्रणेकडून विशेष बंदोबस्त ठेवण्यात आला होता. पोलिस निरीक्षक महादेव वाघमोडे यांच्या मार्गदर्शनाखाली चोख बंदोबस्त तैनात करण्यात आला होता, अशी माहिती श्री महागणपती देवस्थान ट्रस्टच्या अध्यक्षा सौ. स्वाती पाचुंदकर यांनी दिली.
यावेळी अनेक गावांतील तसेच जिल्हाभरातून आलेल्या गणेशभक्तांनी महागणपतीचे दर्शन घेतले आणि आपल्या मनोकामना व्यक्त केल्या. संपूर्ण वातावरण भक्तिमय आणि सात्त्विक होते.